UN BARMITZVA DIFERENTE…

UN BARMITZVA DIFERENTE…

Oy noche de YOM ASHOA.
Vos kiero kontar komo paso mi BAR MIZVA.

No vo alargar kon todo lo ke pasi al tiempo
de la guerra, solo mi BAR MIZVA en este tiempo.

Mos fuyimos kon mi famiya de Salonik a Atena ke
estava en la okupasion de los Italinos.
No fazian ningun mal a los Djidios. I siguro
ke antes de fuyir de Salonik mi padre mos kito
I.D. falsos kon nombres kristianos. Yo por exempio
me yamava TRIANDAFILO i dayinda la tengo la karta
kon el nombre i los detalios eskritos en Grego i
Alman!

En Atena se despartio la famia ke eramos sesh
ermanos i ermanas. Kada uno se eskundio en
diferente lugar. Yo estava kon mi madre i la mas
chika ermana, la ke era grande de mi. Yo so el
mas chiko de la famiya. El mas grande ermano ke
era soldado en la armada Grega fue matado en la
batalia kontra los Italianos.

Una umana manseva ke morava en el mizmo
departamento kon mi madre la tomo un dia a muabet
komo vizinas aun ke mama perkurava de ser en distans
para ke ninguno sepa ke eya es Djudia i sin muchas
hadras le disho “ya lo se ke sosh Djidios ma no te
espantes yo te kiero ayudar, eso viendo tu chiko fijo
komo esta sufriendo aki. Si vas achetar yo lo puedo
meter en lugar ke va estar siguro i va tener de komer
sin problemas. Mi madre troko kolores de su
kara i se le tomo la boz. Solo el fakto ke su
sekreto se aviya deskurvido ya era maz i demaziado !

En fin, despues ke se konsidero kon papa en la prima
okazion ke se enkontraron, acheto i la mansevika
Anula me tomo un dia al PATRIOTIKO IDRIMA ke es
un voluntario institut ke ayuda fijos i fijas de
famias proves. De ayi me tomaron al lo ke se yamava
senatorio! Kuando arivi ayi no me feyi de lo ke esto
viendo, me topi en un kurtijo de monastir i alado
aviya una sala grande yena de kamas i algunos trenta
o kuarenta ninios i ninias asta ocho mueve anyos.
Ma ayinda la surpriz fuerta me vino kuando a la
tadre entrimos al monastir/konvento para la orasion
de “MINHA UMAARIV” bar minan. Devia de bezar las
ikonas i fazer la kruz i yo kon toda la posibilita
ke pude tener este punto ke no me kaygan las lagrimas
dishe de mi entre mi:

SINIOR DEL MUNDO, PEDRONAME POR LO KE ESTO
FAZIYENDO MA YA SAVES KE ES KESTION DE VIDA
O MUERTE. – Oy se se dize PIKUAH NEFESH.

En kurto, yo me komporti komo un mijor kristiano
aun ke perkurava de topar razones para ke no entre
al monastir. Ma un dia stuviendo en la kuzina
ayudando la gizandera oyi un ninio ke me esta
yamando ” Triandafilo Triandafilo un ombre te
esta bushkando.” Yo si no me dezmayi del espanto
era NES porke teniamos en la famia ke uno no save
onde se topan los otros miembros de la famia i
na en supito me estan bushkando ? No tenia
remedio i sali para ver ken me esta bushkando.
De lonje/leshos vide una prsona ma no pude
koneserla asta ke mos aserkinos uno al otro
i la surpriz era komo se dize UNBELLIEVABLE/
de no kreyer. En frente de mi estava viendo
mi ermano Sami. Al punto el miedose troko a
alegria grande ke no se puede imajinar mi
ermano ke no aviya visto kreo doz anios estava
al lado de mi.

En su mano tenia un paketiko chiko i me lo dio
i me disho “esto te lo mando mama porke oy es
el BAR MIZVA tuyo!!! Mis ojos se amojaron de las
lagrimas de alegreya i surpriz i indamas de la
jesta de mama ke me akodro lo ke yo no lo tenia
en mi idea, yo ke no savia afilu la data eya
no se ulvido de mi BAR MIZVA. Adientro del
paketiko avia un pedasiko de pan preto i
amofado ke se kito la miga i se incho kon una
krema dulse. Saviendo ke esforso ke fizo
mama para merkar este pan mofado del merkado
preto/karaborsa, este “gato” era el mas
dulse i pastozo ke gosti en mi vida.

Yosef Levy
Israel.

———————————

Kerido Yosef

Muy munchas grayas por estas
“memoires” ke son de una muy grande
valor i kontribusyon no solo para
muetro sityo ma por todos los
sefaradis del mundo entero.

Por seguro ke tu eskrito sera guadrado
en muestros trezoros, los archivios de
SM para todos ke van azer bushkadas
sovre diferentos sujetos, mizmo dospues
de muncho tiempo ke mozotros no vamos
mas egzistir. Les desharemos un patrimonyo
kultural de muestra epoka kon todo lo ke
tenemos i puedemos.

Si solo muy munchos de muestros miembros
mos puediyan embiyar sus rekuerdos…
No me importa en ke lingua (lo traduizare)
i bueno o manko bueno (lo editare)…
Penso ke son trezoros sin presyo !

Grasyas de muevo.

Kon karinyo

Sharope blanco

GUADRADO EN :

http://groups.yahoo.com/group/Sefaradimuestro/files/

file YOSEF LEVI

Subfile EL BARMITZVA EN EL MANASTIR
http://groups.yahoo.com/group/Sefaradimuestro/files/YOSEF%20LEVI/

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: