LUCHAS DJUDIYAS EN LAS MARES

LUCHAS DJUDIYAS EN LAS MARES por Edmond Cohen
Mayo 15th, 2010
Teksto de la emisyon del programa de radio Muestra Lingua de djueves 13 de mayo, a las 4 06 pm, ora de Fransya.

Mi emisyon de este djueves va ser sovre los marineros djudyos, desde Yonah asta Exodus i los muevos vapores israelyanos sin marineros, pasando por los piratos del Caribe.

El program se puede sintir por Internet kada djueves, indo al sityo RADIO – la fréquence juive Kale tener pasensya i asperar un poko, no se oye pishin.

Saludos a todos
Edmond Cohen – Paris, Fransya
Para Ladinokomunita

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar, vos akodro ke el proksimo atelye de konversasyon de la asosyasyon Vidas Largas se tendra el djueves 27 de mayo 2010, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.

Despues ke eskapi mi emisyon del djueves pasado sovre, una oyente ke no me konosiya me telefono para avlarme de mi emisyon, i despues de un syerto tyempo mos apersivimos ke era la ermana de una amiga miya. Me disho ke se interesava, entre otras kozas, a los piratos djudyos  de los Caribos. I kaji el mismo diya resivi de mi amigo espanyol Eliseo Pardo un teksto de un syerto Moshe Vainroj, bivyendo en Bat-Yam, avlando de los mismos, i de un livro konsagrado a eyos por un syerto Edward Kritzler, ke bive en Jamaica. Antes de Kritzler uvo en 1937 un Rafael Patai, ke ya aviya eskrito un livro en ebreo intitolado «Asapanut aivrit» ( la navigasyon ebrea) Me dishe ke puediya interesarvos de saver ke los djudyos, en primero puevlo de kazalinos, i despues de merkaderes, tuvyeron tambyen i tyenen dainda, no solo ombres de gerra, esto ya lo saviyamos, ama tambyen ombres de gerra en las mares, i esto se save menos.

Por tanto la tyerra de Israel se topa al bodre de la mar Mediterranea, i kale empesar por dizir ke por siguro uvo syempre djudyos peshkadores, en lo ke yamavan la mar de Kineret, ke en vedra es un lago, ama tambyen marineros en la mar Mediterranea.

Se dize ke un trivo era mas marinero ke los otros, era el trivo de Zevulun, asigun esta eskrito en Bereshit, kapitulo 49, pasuk 13 : «Zebulun a puerto de mares morara, y el a puerto de navios, y su termino cerca Sidon».

El Tanah, avlando del profeta Yona, mos dize ke se suvyo sovre una nave en Yafo, i Flavius Josephe, en su livro sovre la gerra de los djudyos kontra los Romanos, durante la primera rebuelta de 66-70, mos konta ke los djudyos de Yafo, no puedyendo bivir de la tyerra por modo de las estruisyones de los Romanos, fraguaron munchas chikas naves, i , korryendo las kostas de Phenicia, de Syria i mismo de Aifton, «por sus pirateriya perturbavan todo el komersyo de estas mares». A lo manko esto es lo ke yo meldi en Flavius Josephe. Ama Moshe Vainroj, el de Bat-Yam, molos prezenta no komo piratos luchando para komer, ama komo askeres atakando las naves romanas para azerles la gerra. No es lo ke meldi en Flavius Josephe, ama ya puede ser vedra, porke meldi tambyen lo ke eskrivyo la profesora Shoshanah Fredericko, dizyendo ke Titus, ke Vespasiano ya aviya metido komo ko-emperador a su lado, izo salir en 72, kijo dizir dos anyos despues la estruisyon de Yerushalaïm i un anyo antes de la de Masada,  una moneda romana, amostrando a su kara de un lado, i del otro lado una «victoria navalis». Komo Titus, en 72,  no aviya luchado kontra otros ke los djudyos,
esto puedriya ser una konfirmasyon ke uvo byen batayas navales entre djudyos i romanos, afillu si son los romanos ke al kavo las ganaron. Kale dizir tambyen, a propozito de monedas romanas, ke se topo en Fransya, en la sivdadika de Pont sur Yonne, una kuryoza moneda amostrando de un lado la kara de Titus, i del otro lado una mujer yorando abasho de un arvole, lo ke konosemos komo judaea captiva, ama sovre esta moneda no esta eskrito judaea capta, ama judaea navalis. Deke judaea navalis? No se save, ama esta moneda egziste i vide una kopia sovre internet…

Kale saver tambyen ke se konta ke en el siglo 6, los djudyos del norte de Afrika, aliados kon los Muzulmanos, atakan a las naves kristyanas, salvo en diya de Shabat!

Kuando tomaron Kairuan, en Tuniziya, los djudyos izyeron prezonero el ovispo yamado Sinieso  ke deklaro despues aver sido byen tratado por los piratos djudyos. Volo konto ansina komo lo meldi tres vezes sovre internet, ama kuando bushki un poko mas, topi ke Kairuan fue fundado en el siglo 7 por los Muzulmanos, de tal manera ke no veo komo los djudyos pudyeron tomar en el siglo 6 una sivdad ke dainda no egzistiya. Del otro lado, bushki un ovispo yamado Sinesio, i topi un ovispo de Libiya ke bivyo en el siglo 5, i ke no fue prezonero de piratas. Kale ser muy akavidozo kon lo ke se eskrive sovre internet, esto ya lo saviya de muncho tyempo. Ama kyen save? puede ser no bushki ande kaliya…

Agora yegamos a la ekspulsyon de los djudyos de Espanya, porke kale ke vos diga ke todos los piratos djudyos, i uvo unos kuantos, fueron djudyos sefaradim. Es muy kuryozo.

Los gangsters de Amerika: ashkenazim. Los piratos, ke sea en la mar Mediterranea o en el Atlantiko: sefaradim… Ansina es …

Empesaremos por la Mediterranea, i por Sinan Reis. Nasido en Izmir al empesijo del siglo 16, dunke poko despues la ekspulsyon de Espanya, este Sinan fue amigo i ayudo de Khaier Eddin, mas konosido en toda la Mediterranea komo Barbarossa, korsaryo i almirante de Suleiman el Magnifiko. Sinan Reis no solo va partisipar al lado de su kapo Barbarossa a la bataya navala de Preveza ke opozo el 28 de septyembre 1538 a 122 naves turkas kontra una koalisyon de 602 naves kristyanas, espanyolas, genovezes,
venezyanas, papales i maltezes, ama el es ke va dar konsilyos de stratejiya (en dos byervos, luchar serka de las kostas para benefisyar de la proteksyon de los kanones turkos) a Barbarossa, ke en primero no los acheta, i despues si. I le va reushir, porke afillu ke teniyan muncho mas piratas naves ke los turkos, los kristyanos, kondusidos por el almirante Andrea Doria, van a resivir una buena haftona ke va dar a los turkos la maestria sovre la Mediterranea
para munchos anyos, asta ke pyedran la bataya de Lepanto en 1571. Sinan Reis va mismo ser almirante de la flota turka entre 1550 i 1553. Meldi ke la bandera de su nave yevava un magen David ke los turkos yamavan el mur de Shelomo (ke es para eyos Suleyman) i ke a su muerte fue enterado en un semetaryo djudyo en Albaniya.

Agora desharemos la Mediterranea por el Atlantiko, en la misma epoka o un poko mas despues. Komo ya lo savemos, la ekspulsyon de los djudyos i la gerra de la Inkizisyon kontra los konversos kaye el mismo anyo ke la deskuvyerta de Amerika, i desde el empesijo los konversos  aprovaron de fuir la Inkizisyon i topar en Amerika un lugar kyeto para aboltar al djudaismo, salvo ke la Inkizisyon los persigyo tambyen en estos muevos territoryos.

No kale enkantarse, en estas kondisyones, de ambezar ke los djudyos sefaradim, konversos o no, teniyan un odyo de la Espanya i de sus Inkizidores, de tal manera ke uvo unos kuantos sefaradim, i komo lo dishe antes, solo sefaradim, no ashkenazim,  ke, munchas vezes aunidos kon los Inglezes izyeron una gerra maritima kontra las naves espanyolas.

Aki vos vo meldar un pedaso de lo ke eskrivyo Moshe Vainroj, el mismo sitando Edward Kritzler

«Si tu viajas a Jamaika, viajero, vijita a los vyejos semetaryos djudyos, i te vas
a enkantar kuando vas a ver tombas abandonadas, kaji enteramente destruidas, ama ke dainda guadran gravadas sovre la pyedra los nombres de los difuntos en karakteres ebreos, akompanyados por los simbolos piratos de los uesos kruzados i la kavesa de muerte, en vezes kon el magen  David… komo por egzemplo en la tomba de Yaacob Mashaj i la de su mujer Deborah en el semetaryo de Bridgetown, en los Barbados».

Bushki sovre Internet, i reushi de topar una foto de una tala tomba: a basho de la kavesa de muerte kon los dos uesos, puve meldar el byervo matseva eskrito en ebreo… No reushi de meldar los otros byervos, vamos a dizir porke la foto no era buena…

Agora vos tengo de avlar de los mas famozos entre estos gerreros maritimos (a mi me plaze mijor de yamarlos  gerreros maritimos  i no piratos, syendo ke en vedra eran mas muncho korsaryos ke piratos, i se atakavan solo a naves espanyolas i no a todas). Vos vo avlar de Shemuel Palachi, de David Abravanel, de Yaakov Koriel, de Moses Cohen Enriques, i de Jean Lafitte.
Empesaremos por Shemuel Palachi, nasido en Fez en la sigunda mitad del siglo 16.

En 1597 fue embashador del Sultan del Maroko, Mulay Sidon, ante la Espanya, i entre los anyos 1605 i 1608 bivyo en Madrid, en la kaza del embashador de Fransya, en una epoka ande la Inkizisyon bushkava las personas sospechadas de ser djudiyas.

En 1609, es embiyado en Holanda komo reprezentante del Sultan Mulay. El fue el primero ke pudo yegar a este pais avyertamente komo djudyo, a la diferensya de los cripto-djudyos ke en akeyos tyempos podian entrar en Holanda solo azyendose pasar komo kristyanos.

Palachi empeso su karrera maritima kuando el rey Felipe III de Espanya refuzo de dar atras al Sultan Mulay Sidon algunos manuskritos arabos de grande valor, kontra la liberasyon de prizoneros de gerra. En reaksyon a esto, el Sultan firmo un akodro kon Holanda kontra Espanya, ama komo los Holandezes no podiyan kombatir avyertamente kontra la Espanya, syendo ke aviyan tomado un anyo antes kon la Espanya un akodro de trega de dodje anyos, dechidaron enbiyar a Palachi para ke atake a las naves espanyolas
en medyo del mar. Los olandezes le dyeron una nave de gerra kon marineros olandezes, i en akodro kon el Sultan Mulay, le dyeron un dokumento enkargandolo de atakar  todas las naves espanyolas. Tres mezes despues , Palachi ya aviya atakado kon sukseso a una nave espanyola ke veniya de Indya kargada kon kuero i otras kozas, i a una nave portugeza ke traiya asukar de Brazil.

Malorozamente, a la buelta le afito una epidemiya en su nave ke lo ovligo a kedarse en Plymouth, en Ingletyerra, para ayudo mediko. Pishin el embashador de Espanya demando a los Inglezes de aferrarlo, ama Palachi se pudo ir sin danyo, ama poko despues, su nave se kayo sovre un banko de arena serka de Dartmouth, i esta vez fue aferrado i djuzgado, ama los Inglezes no syendo grandes amigos kon los espanyoles, fue inosentado
i liberado, afillu djudyo i korsaryo. Se abolto a Holanda ande muryo en 1616.
Despues de Palachi, kale dizir dos byervos de David Abrabanel, ke keriya vengarse de la matansina de su famiya por los Espanyoles, ke se auno kon los Inglezes i ke komando kon el nombre de Captain Davis una nave yamada The Jerusalem. Se konta ke no atakava nunka en diya de Shabat, ke se komiya solo kasher en su nave, i ke su diaryo de kamino era eskrito en karakteres ebreos.

Kale avlar de Yaakov Koriel , nasido en una famiya djudiya konvertida por fuersa.

Kuando era kapitan en la flota espanyola, fue aferrado por la Inkizisyon, i liberado por sus marineros, entre los kuales aviya tambyen munchos marranos. De este diya su solo eskopo fue de vengarse, i por esto komando a tres naves piratas ke atakavan a las naves espanyolas. Se konta ke despues se fue a estudiar la kabala en Safed, en Erets Israel ande muryo.
Kale tambyen avlar de Moses Cohen Enriques, un djudyo de orijen portugeza refujyado en Holadia ande keriya vengarse de los Espanyoles i Portugezes. Reusho a tomar haberes de un kargamyento de plata ke deviya salir de Amerika, i se auno kon el kapitan olandes Piet Hein, ke atako a los espanyoles kon 25 naves, i les arrovo a toda su plata, la mas grande tomada de la istorya de la pirateriya, lo todo sin azer korrer sangre.

Despues Cohen se establesyo en una isla suya serka de las kostas del Brazil kuando eran los olandezos ke estavan aya. A la vinida de los Portugezes, fue ovligado de irse, i kontinuo su gerra aunandose kon el pirato ingles Henry Morgan, konosido por ser gran amigo de los djudyos.

Vos tengo tambyen de avlar de Jean Laffite, un franses nasido verso 1774 en una famiya sefardi. El disho ke sus nonos aviyan sido torturados por la Inkizisyon. Ama es sovre todo kontra los Inglezes ke lucho al lado de los Amerikanos en Louisianne. Fue un pirato importante ke tuvo asta mil ombres, i puede ser mas, de basho de sus ordenes.

No se save ni komo ni kuando se muryo.

Agora, por siguro, no puedo eskapar mi emisyon sin avlarvos de los  marineros djudyos de oy, kijo dizir los de Israel, ke lucharon kontra los inglezes ay unos setenta anyos, i ke desde este  tyempo luchan kontra los arabos.

La lucha kontra los inglezes, es toda la istorya de la aliya bet, despues del Livro Blanko, lo ke ya vos dishe avlandovos  aze poko de David Ben Gurion.

Djusto kuando los djudyos tuvyeron lo mas menester de sus tyerra komo abrigo, kijo dizir kuando los nazis empesaron la schoa, los inglezes serraron las fronteras de Erets Israel, ovligando los djudyos de irsen en Erets a eskondidas, sovre vapores yenos de desmazalados fuyando la muerte, i ke yene la toparon, komo los del Struma, ke se batireo kon eyos.

El mas konosido de estos vapores de la aliya Bet es por siguro el Exodus, un vyejo vapor de rio venido de Amerika en Fransya en 1947, ande la Haganah, kon el ayudo del governo franses ke acheto de serrar los ojos, enkasho a mas de 4.000 imigrantes djudyos venidos de los kampos de Evropa.

Los oyentes ke no saven la istorya pueden pensar ke esto todo es una manera de luchar sin violensa, i es vedra, ama no kale olvidarse ke los vapores inglezes atakaron a este vapor Exodus, ke los djudyos rezistyeron, i ke uvo en la bataya tres muertos djudyos, inkluyendo un marinero amerikano del vapor ke se yamava William Bernsteen, venido de San Francisco para ayudar a sus ermanos djudyos de Evropa. No kale olvidarse tampoko de la mujer prenyada ke se muryo en el vapor dando la luz a su kriatura.

Komo se save, los djudyos aferrados fueron metidos en tres vapores-prezo inglezes, aboltados en primero en Fransya ande no achetaron de abashar, salvo 75 hazinos. Se kedaron en el vapor en un enverano muy kayente, en kondisyones terrivles, durante diyas, i esta rezistensya djudiya merese tambyen de ser akodrada en mi istorya. Despues de la Fransya fueron aboltados en Almanya, lo ke puediya apareser komo una desfecha, ama ke en vedra ayudo a Ben Gurion i a Israel para obtener en novembre de este mismo anyo 1947 el famozo voto de la Onu para la kreasyon de un estado djudyo. Todos estos djudyos prezoneros en Almanya pudyeron irsen en su muevo pais de Israel, de tal manera ke esta sözde desfecha se eskapo en una viktorya istorika.


Komo se deve, agora el Estado de Israel tyene una armada de vapores de gerra, ke se ilustraron en las gerras de Israel kon munchas viktoryas, empesando por el batireo del vapor ejipsyano Emir Farouk durante la gerra de independensya. Ama la mas famoza viktorya me parese ser  la toma del vapor ejipsyano Ibrahim el Awal en la noche del 30 al 31 oktovre 1956.

Yevado a Haifa, este vapor ejipsyano se va azer vapor israelyano yamado Haifa.

Esto dicho, Israel konosyo tambyen negros haberes, komo, pokos mezes despues de la gerra de los sej diyas, en oktovre 1967 , el destroyer Eilat ke fue batireado, i unos kuantos mezes despues  fue el submarino Dakar ke se peryo kon todos sus 69 marineros.

Los vapores de Israel eran merkados a otros paizes, i todos mos akodramos de las famozas vedettes de Cherbourg, merkadas i pagadas por Israel, i ke el Governo franses keriya guadrar en Fransya… lo ke no reusho. Agora Israel, enrikesido por la eksperyensa, se fabrika sus propyos vapores, a la punta del modernismo. Son los israelyanos ke an imajinado i fraguado el vapor sin kapitan ni ekipaje, ke se va solo sovre la mar ande puede azer danyo a los otros, sin danyo a si mismo.

Vos vo deshar sovre este buen haber, i vos digo al djueves ke vyene, si kyere el Dyo !

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: